Shir caalami ah oo looga hadlayay kaalinta qurba joogta ee dhinacyada horumarinta, ganacsiga & isbeddelka cimilada, ayna soo qabanqaabiyeen hay’adda (African diaspora Center) ayaa lagu qabtay magaalada Den haag.
C/salaam Faarax Cali [Cabdisalaan Karood] oo madax ka ah xafiiska Kaalo Netherland, oo shirkaasi ku metelayay qurba-joogta Soomaalida ayaa sheegay in shirka lagu soo bandhigay cilmi-baaris ay sameeyeen hay’ado iyo ururo caalami ah, kuna saabsan kaalinta qurba joogta ee horumarinta dalalka ay asal ahaan ka soo jeedaan.
“Muhiimad gaar ah ayuu shirkaasi lahaa, cilmi baarista la soo bandhigay waxaa lagu sheegay. in dhaqaalaha ay geliyaan qurba joogtu dalalkooda uu ka badan yahay dhaqaalaha waddamada Yurub ku bixiyaan dalalkaas” Ayuu yiri C/salaan Karood, wuxuuna intaasi ku daray in qurba-joogtu ay ahmiyad weyn ugu fadhiyaan marka loo fiiriyo dowrka ay ku leeyihiin dhaqaalaha, ganacsiga & horumarinta bulshada.
C/salaam Karood, wuxuu kaloo sheegay shirkaasi dalalka ka soo qeybgalay in ay ka mid ahaayeen waddamada Nigeria, Siraliyooon, Itoobiya, Gana & Soomaaliya.”
“Waxaan ku soo bandhignay shirka waxqabadka ururka Kaalo oo ka farcamay dedaal ay sameeyeen dad qurba joogta ah, dadkii ka soo qeybgalay aad ayeye u bogaadiyeen Kaalo” Ayuu yiri Cabdisalaan.
